Resumen de Xornadas por un medio rural galego vivo: crónica
Xuntar os esforzos de entidades e particulares que traballan en Galiza pola defensa dun futuro para o medio rural galego foi o obxectivo das "Xornadas por un medio rural galego vivo" celebradas os días 20 e 21 de abril en Pontevedra e Poio, respectivamente. Este propósito quedou reflectido na sinatura dunha "Alianza polo rural" entre ADEGA, a Confederación Sindical Galega (CIG), a Federación Rural Galega (FRUGA) e a Organización Galega de Comunidades de Montes en Man Común (ORGACCMM), presenciada por unhas 200 persoas. A Alianza queda aberta a adhesións doutras entidades que traballen a prol da reactivación do rural, tendo en conta o seu carácter multifuncional (social, ambiental e económico).
